Shkurt | Politika

Seanca e Kuvendit nis me pasiguri

Nga , - 03.08.2017

Gabimi i kryetarit shkakton ndërprerje aksidentale.

Seanca fillestare e Kuvendit të Kosovës nisi me kaos sot (3 gusht). Nuk u zgjodh as kryetari i Kuvendit, e as zëvendëskryetarët. Kreu i seancës konstitutive, Adem Mikullovci i Vetëvendosje – i cili si 76 vjeçar dhe deputeti më i vjetër kishte të drejtë që ta drejtonte seancën –  por megjithatë e mbylli si duket atë pa dashje, para se të ipej ndonjë nominim për kryetar të Kuvendit.

Pas një periudhe hutie, u lajmërua se seanca do të fillonte përsëri në 15:00, edhe pse më vonë u shtye për të premtën, pasi koalicioni PAN (PDK-AAK-Nisma) nuk u paraqitën përsëri, ashtu sikurse deputetët e partive minoritare, duke pamundësuar kështu kuorumin për seancë.

Gabimi i Mikullovcit ndodhi pasi koalicioni PAN kishte kërkuar pauzë dy-orëshe për “konsultime të mëtejme”, në mënyrë që të siguroheshin se kanë 61 votat e nevojshme për ta zgjedhur kandidatin e tyre për kryetar të Kuvendit. Edhe pse emri i kandidatit të tyre ende nuk është shpallur zyrtarisht, gjerësisht besohet se do të jetë lideri i PDK, Kadri Veseli.

Si deputeti më i vjetër, Adem Mikullovci i Vetëvendosje e udhëhoqi seancën fillestare të Kuvendit. Foto: Atdhe Mulla / K2.0.

Propozimi i PAN për të mbajtur pauzë ishte refuzuar prej deputetëve me 60 vota pro e 60 kundër; në fakt edhe kjo ndarje u debatua, meqë Milaim Zeka i Nismës deklaroi se nuk kishte votuar në favor të pushimit të propozuar, dhe se ishte i hutuar për atë se për çfarë po votohej në atë rast. Pa marrë parasysh votën e Zekës – e cila ishte numëruar si një prej 60 votave në favor të propozimit për pauzë – 61 vota kërkoheshin për të mbajtur pushim.

Kërkesa për këtë pushim për konsultime të mëtejme dhe refuzimi i saj nga Kuvendi lë të kuptohet që prej 120 deputetëve në sallë, PAN nuk kishte një mazhorancë që favorizonte përzgjedhjen e tyre për kryetar të Kuvendit, e kështu po përpiqeshin që të fitonin më shumë kohë për t’i bindur tjerët që të votojnë për nominimin e tyre.

Pasi Enver Hoxha i PDK doli në folëtore për të thënë se ishte detyrë e Mikullovcit që të garantonte zgjedhjen e kryetarit të Kuvendit, e prandaj edhe pauza duhet të miratohet, Mikullovci tha “me këtë e shpalli të mbyllur mbledhjen”. Deputetët filluan të dalin prej sallës së Kuvendit, ndërsa Mikullovci bënte përpjekje të pasuksesshme për ta vazhduar seancën.

Enver Hoxhaj i PDK kërkoi pauzë dy-orëshe, gjë që shkaktoi polemika dhe huti. Foto: Atdhe Mulla / K2.0.

Huti pati edhe më herët gjatë seancës kur deputetët e PAN nuk ishin të pranishëm për nominimin e anëtarëve që i bashkohen komitetit të detyrueshëm ad hoc që garanton operimin e seancës themelore sipas rregullave procedurale. Deputetët e PAN u futën në sallë menjëherë pasi ishin nominuar kandidatët. Pas një pauze të shkurtër, komiteti propozoi që të lejonte PAN-in që t’i nominojnë përfaqësuesit e vet për komitet, megjithatë PAN përsëri nuk ishin të pranishëm në Kuvend, e kështu deputetët që ishin të pranishëm votuan që të vazhdojnë pa ta. Pas një pauze tjetër, partitë e PAN u lejuan që t’i nominojnë përfaqësuesit e tyre për komitet.

Teuta Rugova (LDK), e cila si deputetja më e re duhet ta asistojë në udhëheqjen e seancës konstitutive, gjithashtu mungoi për pjesën më të madhe të seancës, para se të kthehej për të votuar në favor të pushimit dy-orësh. Në javët e fundit pati spekulime të vazhdueshme që Rugova do të votone me PAN kundër linjës së partisë së saj në zgjedhjen e kryetarit të Kuvendit, e gjithashtu edhe më vonë për qeveri.

Teuta Rugova (LDK), e cila ishte subjekt i shumë spekulimeve që thonin se ajo do ta shpërfillte linjën e partisë së saj për të votuar me PAN, ishte një prej atyre që votuan pro pauzës për “konsultime të mëtejme”. Foto: Atdhe Mulla / K2.0.

Para përfundimit aksidental të seancës, të gjithë 120 deputetët kishin dhënë betimin solemn, që u lexua nga Mikullovci.

Seanca do të thirret përsëri në 10:00 të premtën më 4 gusht.

Betimi solemn

Betimi i dhënë prej anëtarëve të Kuvendit:

“Unë, deputet i Kuvendit të Republikës së Kosovës, betohem se me nder dhe përkushtim do të kryej detyrën time dhe do ta përfaqësojë me dinjitet popullin, do të punojë në interes të Kosovës dhe gjithë qytetarëve të saj, do të angazhohem për mbrojtjen dhe respektimin e kushtetuetshmërisë dhe ligjshmërisë, për mbrojtjen e tërësisë territoriale dhe të integritetit institucional të Kosovës, për garantimin e lirive dhe të drejtave të njeriut, në përputhje me ligjet e vendit dhe me standardet evropiane. Betohem!”

Foto kryesore: Atdhe Mulla / K2.0.

KOMENTET

0
KOMENTO

KOMENTO