Nganjëherë, jetesa në kontekste të vështira sociale, ekonomike e bën të vështirë të flasësh e lexosh për gjëra të mira. Zgjohesh në mëngjes, nuk ke ujë me i la sytë. E planifikon ditën, por rryma ka plane tjera. Halle me mbeturinat në lagje, që nuk të lënë të dalësh prej shtëpisë. Qytet a fshat pa trotuare. S’ke shumë vende ku me e kalu kohën. Rrugë t’pandrequra. Çmimet e larta e shporta bosh. Një lajm në televizor, që feston dhunën ndaj të tjerëve. Një rast i dhunës ndaj dikujt, veç pse ai dikush sfidon normat, që rrethi i ka vendos. Kyçesh n’rrjete sociale, gjen gjuhë t’urrejtjes. 

Radha është e gjatë. Por, a flasim për diçka tjetër pak?

Sa është e gjatë radha e problemeve me të cilat mund të përballemi përditë, aq e gjatë e edhe më e gjatë, besojmë është radha e njerëzve, të cilët/at janë angazhuar për ndryshim, janë angazhuar që t’i kundërshtojnë vështirësitë, qoftë ato me të cilat përballen vetë përditë, qoftë ato me të cilat përballet komuniteti, shoqëria. 

Duam të dëgjojmë për këto nisma, së pari, që ato të zënë vendin e tyre në kaosin informativ e së dyti, që të frymëzohemi prej teje, prej shoqërisë tënde, prej nismave tuaja. Duam të dëgjojmë nga të rinj e të reja që përditë kërkojnë ndryshim prej qeverive qendrore e lokale, për çështje që lidhen, ndër tjera, me politikat sociale, drejtësinë gjinore dhe të drejtat e njeriut, mjedisin.

Dua të të dëgjojmë ty, që je bërë i pashpërfillshëm me aktivizmin tënd. Shkruaj një blog 800 deri 1,000 fjalë për ndryshimin që ti ose dikush rreth teje e ka bërë. Për të parë se si duken shkrimet blog, lexo këtu shkrimet e qindra njerëzve tjerë, që kanë ndarë rrëfimet e tyre me K2.0.

Përpiqu t’u përgjigjesh pyetjeve: Kur ishte hera e parë që vendose të bësh diçka për komunitetin, shoqërinë? Çka t’u bë halë në sy, problemi që doje ta adresoje? Çka të shtyri të qëndrosh kundër padrejtësive? Kur vendose ta thyesh ciklin e dhunës? Qysh ia nise? Cilat ishin veprimet e para? Me çka u përballe kur nise të shkundësh rehatinë? A hase në rezistencë? Si reaguan t’shpisë e shoqëria, institucionet? A pate përkrahje? Çfarë ndryshimi ka sjellë aktivizmi yt në ty e në shoqëri?

Na e dërgo blog tënd në email: [email protected] deri më 15 shkurt 2024. Autorët/et, rrëfimet e të cilëve/ave zgjedhen për botim do të pranojnë një pagesë për punën e tyre, si dhe do të kenë mundësinë të punojnë për së afërmi me ekipin e redaksisë së K2.0.

Imazhi i ballinës: Dion Krasniqi / K2.0

Ky aktivitet mbështetet nga Ambasada e Mbretërisë së Holandës në Kosovë. Pikëpamjet e prezantuara gjatë aktivitetit nuk përfaqësojnë domosdoshmërisht pikëpamjet e Ambasadës së Mbretërisë së Holandës.