K2.0 Hajde Folim për përvetësimin e kulturës rome

Kronikë dhe fotografi nga ngjarja
Rreth kësaj bisede
Më 8 prill shënohet Dita Ndërkombëtare e Romëve. Kjo datë shihet si një mundësi për festimin e kulturës rome, por edhe për ngritjen e ndërgjegjësimit rreth çështjeve që i shqetësojnë rreth 15 milionë romë në mbarë botën si dhe thekson diskriminimin që ky komuntitet e përjeton në sfera të ndryshme të jetës.

Në Kosovë, kjo shënon njërën nga ditët e rralla gjatë vitit kur politikanët i përmendin apo i adresojnë komunitetin rom që jetojnë në vend. Ligjet progresive, letrat dhe dokumentet prezantohen dhe shpallen si ngjarje të suksesshme të angazhimit institucional.

Por, pamjet e lagjeve rome me foto të varfërisë së skajshme, margjinalizimi dhe dëbimet shoqërore dhe ekonomike, vënë në dyshim sa shumë prej këtyre fjalimeve të mëdha përkthehen në përfshirje, pranim dhe luftim kundër racizmit.

Ende nuk është bërë asgjë për të shënuar luftën për njohjen e kulturës, historisë dhe të drejtave të romëve — thelbi i Ditës Ndërkombëtare të Romëve. Kultura e pasur, që është njëra ndër veçoritë më të rëndësishme të komunitetit rom, zakonisht reduktohet te muzika që publiku e vlerëson herë pas here.

Në diskutimin më të fundit të Hajde Folim, pyesim: A e ka humbur kuptimin Dita Ndërkombëtare e Romëve në Kosovë? A po ndodh përvetësimi i kulturës rome në Kosovë? A po e konsumon shoqëria kulturën rome, veçanërisht muzikën, e në të njëjtën kohë po lejon që po ata persona që i takojnë kësaj kulture të trajtohen si qytetarë të klasës së dytë? Si mund t’i mbajmë përgjegjëse institucionet përkatëse për mos adresimin e çështjeve që qytetarët romë i përjetojnë në mënyrë shoqërore, politike dhe ekonomike?

Bashkohuni të enjten më 4 prill, në orën 18:00, në hapësirën e K2.0 për një diskutim të hapur dhe përfshirës, ku do t’i trajtojmë të gjitha këto pyetje dhe më shumë. I kemi ftuar disa persona për të filluar bisedën:
- Sakibe Jashari – Antropologe/Zyrtare e Programit ROMACTED në Këshillin e Europës
- Habit Hajredini – Drejtor i Zyrës për Qeverisje të Mirë
- Avni Mustafa – Drejtor i Roma Versitas Kosovo
- Denis Galushi – Gazetar dhe aktivist
Diskutimi do të moderohet nga gazetarja e K2.0 Dafina Halili.K

*Do të ketë përkthim në gjuhën rome/angleze/shqipe

Ky edicion i Hajde Folim financohet nga National Endowment for Democracy.
Shikojeni këtë edicion tani
LIVE: Hajde Folim për përvetësimin e kulturës rome Në diskutimin më të fundit të Hajde Folim, pyesim: A e ka humbur kuptimin Dita Ndërkombëtare e Romëve në Kosovë? A po ndodh përvetësimi i kulturës rome në Kosovë? A po e konsumon shoqëria kulturën rome, veçanërisht muzikën, e në të njëjtën kohë po lejon që po ata persona që i takojnë kësaj kulture të trajtohen si qytetarë të klasës së dytë? Si mund t’i mbajmë përgjegjëse institucionet përkatëse për mos adresimin e çështjeve që qytetarët romë i përjetojnë në mënyrë shoqërore, politike dhe ekonomike?Nëse dëshironi t'i bashkoheni bisedës, leni pyetjet tua në koment!

Posted by KOSOVO 2.0 on Thursday, April 4, 2019
Rreth folësve/eve
Denis Galushi

Denis Galushi është gazetar nga Prizreni. Ka përfunduar studimet baqellor në Komunikim Masiv dhe Gazetari nga AAB në Prishtinë. Momentalisht punon si gazetar në RTK. Denisi shkruan poezi dhe për gjashtë vite ka qenë pjesë e Teatrit Rom në Prizren. Poashtu është vullnetar në shumë OJQ që punojnë në fushën e të drejtave të njeriut dhe kulturës.

Sakibe Jashari

Sakibe Jashari është fituese e bursës Chevening, e cila diplomoi në Antropologji nga University of Sussex, me fokus në antropologjinë e pajtimit. Gjithashtu ka diplomë baqellor në London School of Economics dhe ka përvojë të gjërë në punën rreth çështjeve të komuniteteve, drejtësisë tranzicionale dhe me të drejtat e njeriut.

Avni Mustafa

Avni Mustafa u lind në Plementinë, Kosovë. Si aktivist i ri, filloi të punojë si menaxher për organizatën joqeveritare lokale Romano Resaipe. Avniu është aktivist në fushën e të drejtave të njeriut, edukator, gazetar dhe autor. Momentalisht punon si Drejtor Ekzekutiv në Roma Versitas Kosovo dhe ka qenë i përfshirë në shumë OJQ dhe projekte.

Habit Hajredini

Habit Hajredini u lind në Prizren, Kosovë. Ai është Koordinator Kombëtar për të Drejtat e Njeriut dhe kryesues i Këshillit Kombëtar për Bashkëpunim me Shoqërinë Civile. Është gjithashtu koordinatori kryesor për zbatimin e strategjisë që ka si qëllim integrimin e komuniteteve rom, ashkali dhe egjiptas në Kosovë për periudhën 2017-2022.