S`fundmi | COVID-19

Rekorde të reja të rasteve me COVID-19 në Kosovë

Nga - 07.07.2020

Masat e reja kufizuese hynë në fuqi të hënën.

Të hënën Kosova regjistroi numrin më të lartë të rasteve të reja të konfirmuara me COVID-19, pasi 195 persona të testuar dolën pozitivë. Shumica e këtyre rasteve, 102, ishin në Prishtinë.

Numrat e fundit u bënë të ditur një ditë pasi qeveria vendosi masa të reja kufizuese në përpjekje për të trajtuar pandeminë, pasi rastet janë rritur ndjeshëm në javët e fundit. Fundjava gjithashtu pati numra të rinj rekord në Kosovë, me numrin më të madh të vdekjeve dhe të rasteve të reja në një fundjavë të vetme që nga fillimi i pandemisë në mes të marsit.

Shtatëmbëdhjetë pacientë me COVID-19 raportohet të kenë vdekur në spitalet e vendit gjatë fundjavës; pas katër vdekjeve të tjera të hënën, numri i përgjithshëm i viktimave të personave të konfirmuar me COVID-19 tani është 79. Me numrat rekord të së hënës që iu shtuan më shumë se 300 rasteve të konfirmuara gjatë fundjavës, Instituti i Shëndetësisë Publike thotë se tani janë mbi 1,600 raste aktive në të gjithë vendin.

Masat e reja të qeverisë variojnë nga ora policore në katër komuna, rregullat e reja për funksionimin e bareve, deri te riorganizimi i institucioneve shëndetësore dhe vendosja e prioriteteve të reja.

Kryeministri Avdullah Hoti gjithashtu ka thënë se qeveria do të fillojë rregullisht të raportojë për atë që po ndodh brenda Klinikës Infektive në Qendrën Klinike Universitare të Kosovës (QKUK) për t’iu treguar njerëzve “saktësisht çfarë vuajnë njerëzit e prekur nga COVID-19”, pasi citoi një sondazh që thoshte se 30% e kosovarëve nuk besojnë se koronavirusi ekziston.

Ministri i Shëndetësisë Armend Zemaj tha të hënën se zbatimi i masave të reja nuk është “nga deshira, por nga imperativi i situatës së krijuar nga mosrespektimi i masave liruese”.

Masat e prezantuara nga 6 korriku

Ndërsa është raportuar se Klinika Infektive e QKUK-së i ka tejkaluar kapacitetet për pranimin e pacientëve të rinj dhe klinikat e tjera dhe spitalet rajonale kanë rritje të numrit të pacientëve, qeveria vendosi në mbledhjen e saj virtuale të dielën (më 5 korrik) t’i riorganizojë klinikat dhe të ndajë më shumë shtretër dhe pajisje mjekësore për të trajtuar pacientët e prekur.

Vendimi obligon Ministrinë e Shëndetësisë dhe institucionet e tjera përgjegjëse ta mobilizojnë stafin mjekësor në të gjithë vendin, përfshirë ata që nuk janë aktualisht të angazhuar, dhe të riorganizojnë stafin shëndetësor me fokus në pacientët me COVID-19.

Punonjësit e kujdesit shëndetësor kanë paralajmëruar se Kosova nuk ka staf të mjaftueshëm për të trajtuar numrin në rritje të pacientëve me COVID-19. Blerim Syla, kreu i Sindikatës së Punëtorëve Shëndetësorë, ka thënë për Radion Evropa e Lirë të dielën (më 5 korrik) se stafi i kujdesit shëndetësor është “i stërlodhur dhe i mbingarkuar”.

“Nuk dua të përhap panik që është duke dalë situata prej kontrollit, mirëpo unë mund të themse jemi duke i stërmbushur kapacitetet”, ka thënë ai.

I njëjti orar vlen për bare, kafene, restorante dhe ambiente të tjera gastronomike në të gjithë vendin.

Masat e reja parashohin licencimin e institucioneve private shëndetësore për të kryer testime, dhe një zhvendosje drejt prioritizimit vetëm të “më nevojtarëve” për testim. Për tre muajt e parë të shpërthimit të COVID-19 në Kosovë, autoritetet testuan kontaktet e njohura të të gjithë atyre që ishin konfirmuar se kishin COVID-19, por për shkak të rasteve në rritje dhe kapaciteteve të kufizuar për testim, më 22 qershor agjenda e testimit u reduktua në vetëm kontaktet simptomatike.

Nga e hëna (6 korriku), qeveria rivendosi orë policore për qytetarët nga ora 21 deri në 5 të mëngjesit në Prishtinë, Vushtrri, Ferizaj dhe Prizren; përveç atyre me nevoja urgjente shëndetësore, që kërkojnë ndihmë nga institucionet në rastet e dhunës në familje, që ndihmojnë anëtarët e familjes të cilët janë të sëmurë ose që kanë nevoja shtesë për ndihmë, dhe në raste të vdekjes së ndonjë anëtari të familjes.

I njëjti orar (nga ora 21 deri në 5) vlen për bare, kafene, restorante dhe ambiente të tjera gastronomike në të gjithë vendin. Për më tepër, gjatë orëve në të cilat lejohen të punojnë (5 deri në 21), këto biznese lejohen të hapen vetëm në hapësira të jashtme dhe me 1,5 metra hapësirë ndërmjet tavolinave.

Për të siguruar që kjo distancë fizike minimale të respektohet, transporti publik lejohet të operojë vetëm me gjysmën e kapacitetit të zakonshëm për sa i përket numrit të udhëtarëve të lejuar brenda.

Zemaj ka paralajmëruar dënime për këdo që nuk i zbaton masat e reja. “Në mbikqyrje të zbatimit të masave do të jenë inspektorët e inspektorateve (Inspektorati Sanitar i Agjencisë së Ushqimit dhe Veterinarisë, i Ministrisë së Tregtisë dhe Industrisë, Inspektoratet Komunale, dhe mekanizmat e sigurisë etj). Komunat do të riaktivizojnë plotësisht shtabet emergjente”, tha ai në një postim në Facebook të hënën.

I pyetur në një konferencë për shtyp të dielën në lidhje me bazën ligjore për vendosjen e sanksioneve për mosrespektimin e masave të reja, Kryeministri Hoti tha se Ligji për Sëmundjet Infektive është “i mjaftueshëm”.

Sidoqoftë, Artan Murati, këshilltar i Kryetares së Kuvendit Vjosa Osmani, ka thënë se “absolutisht nuk ka bazë të mjaftueshme ligjore” për adresimin e pandemisë dhe se është i nevojshëm një ligj i ri. Osmani inicioi Projektligjin për Parandalimin dhe Luftimin e Pandemisë COVID-19 në prill, i cili ende është në pritje të shqyrtimit nga qeveria.

Zyra e qeverisë për komunikim me publikun ka thënë për KALLXO.com se projektligji do të rishikohet në mbledhjen e ardhshme të qeverisë, e cila pritet të mbahet këtë javë.K

Imazhi i ballinës: Atdhe Mulla / K2.0.

KOMENTET

0
KOMENTO

KOMENTO

Kthehu n'fillim

THANKS FOR YOUR COMMENT

AFTER A QUICK CHECK IT WILL BE PUBLISHED HERE. PLEASE BE PATIENT.

THANKS FOR SUBSCRIBING

THANKS FOR YOUR COMMENT

AFTER A QUICK CHECK IT WILL BE PUBLISHED HERE. PLEASE BE PATIENT.